“Жалкий лепет оправданья”

Шчыра кажу: чакаў нейкіх зразумелых аргументаў ад кіраўніцтва БНФ наконт іхняй пазіцыі па падтрымцы фейкавай кандыдаткі Таццяны Караткевіч. Ды прачытаўшы пазіцыю-заклік лідэра БНФ Аляксея Янукевіча,  на розум прыйшла бессмяротная фраза М.Ю. Лермантава з паэмы “ Смерть поэта”.

Нічога Аляксей Янукевіч у якасці бяссрэчных аргументаў на карысць фейкавага ўдзелу ў выбарах Лукашэхнкі не прывёў. Бо такіх аргументаў проста няма. Не лічыць жа важкім аргументам тое, што ўлады дазволілі пікеты з выкарыстаннем нацыянальнай сімволікі. Лукашэнку гэта зараз выгодна, ён дэманструе Маскве, што нашыя нацыяналісты цалкам пад кантролем. Пад каўпаком. Дый нацыянальныя бела-чырвона-белыя сцягі ніколі афіцыйна не забараняліся, выкарыстоўваліся на ўсіх акцыях апазіцыі. Так што гэты “аргумент” прыцягнуты за вушы. Ну а ўсё астатняе, выказанае сп. Янукевічам, прынамсі, гучыць дзіўна. Хіба сп. Янукевіч не ведае , хто і што стаіць за фейкавай кандыдаткай Караткевіч? Ведае. Дый мой папярэдні артыкул Чем ниже лизнёшь – тем выше поднимешься», мяркую, лідар БНФ чытаў. І ведае, як сённяшняе атачэнне сп.Караткевіч літаральна ”з’ела” Някляева і працягвае яго бэсціць. Таму не буду далей будаваць здагадкі. А выкажу сваё меркаванне, якое, лічу , блізкім да ісціны. На маю думку, сапраўдным матывам падтрымкі партыяй БНФ фейкавай фігуры спадарыні Караткевіч з’яўляецца матэрыяльна-фінансавы бок. Ён зараз, на фоне крызісу ва ўсім( у тым ліку і ў тым, што лічылася прынцыповасцю і маральнасцю ў палітыцы і ў жыцці), выходзіць на першы план. Звычайна такая жыццёвая пазіцыя і падобныя жыццёвыя арыентыры і прыярытэты характэрныя для многіх прадстаўнікоў “канторы Д’ябла”. Многія з супрацоўнікаў “канторы” пайшлі туды на працу з-за матэрыяльных выгодаў. І для іх з прыходам да ўлады Лукашэнкі стала нормай ламаць лёсы і жыцці многіх сумленных людзей. Ці дапаможа такая пазіцыя БНФ ўзмацніць свой аўтарытэт? Ці ўдасца гэтай палітычнай структуры падвысіць аўтарытэт свайго лідара? – Не ведаю. У мяне адназначнага адказу на гэтае пытанне няма. Бо ў беларускай палітыцы, дый у грамадстве наогул, зараз назіраецца тэндэнцыя, што выражаецца формулай “Свая кашуля бліжэй да цела”. Пры гэтым, каб неяк апраўдацца ці зарэтушыраваць сваю сапраўдную сутнасць, некаторыя палітыкі і “дзеячы ад палітыкі” спасылаюцца на неістотныя рэальныя плюсы ад магчымасці пікетаў( бесперашкоднае ўжыванне нацыянальнай сімволікі ды інш.). Але гэтыя плюсы – сотая доля таго велізарнага мінусу, які ў выніку атрымаюць чарговыя лжэ-кандыдаты і лжэ-кандыдаткі ад апазіцыі, калі яны прымуць(ці ужо прынялі?) рашэнне наконт махлярства і падману. Гэта значыць, панясуць стосы сфальсіфікаваных подпісаў да спадарыні, што вучыць варыць боршч. Ужо зараз, гледзячы на тое, як, на якім фоне і ў якіх ўмовах праходзіць збор подпісаў (а менавіта: поўнай апатыі, страху ў грамадстве і нявер’я ў магчымасць нешта змяніць “выбарамі “) , -- нават сляпому зразумела, што ніхто з апанентаў Лукашэнкі не збярэ й паловы подпісаў. Маецца на ўвазе паловы ці, нават траціны ад колькасці ў сто тысяч з гакам, што неабходна сабраць для рэгістрацыі ў якасці “кандыдата  ў Прэзідэнты на выбарах Лукашэнкі” . Тое, што мы маем справу выключна з выбарамі Лукашэнкі – з гэтым, думаю, сп. Аляксей Янукевіч спрачацца не будзе. Таму лагічна звярнуцца да сп. Таццяны Караткевіч з заклікам не даць запэцкаць сваё імя брудам. Ад якога ў палітыцы не адмыцца.  І я звяртаюся да Таццяны Караткевіч са шчырым пажаданнем-заклікам: не дай сябе запэцкаць! Тыя матэрыяльныя выгоды, што ўжо зараз ідуць і тыя, што абяцаюць за згоду здаць фальш “спадарыні Ярмо”( выраз не мой, а шаноўнага публіцыста і аналітыка А.Сідарэвіча) -- гэтыя выгоды нічога не вартыя. Бо ад той ганьбы і грэблівасці, што будзе па жыцці ісці ў адносінах да Вас з боку сумленных людзей Беларусі будзе вельмі цяжка адмыцца. Амаль немагчыма. У сённяшніх умовах гаворка ўжо ідзе не пра байкот-удзел, а пра подыгрыш-ігнор. P.S. У каментары да артыкула-закліку сп. А.Янукевіча я выказаў здзіўленне наконт дапушчэння збору звыш ста тысячаў подпісаў камандай Т. Караткевіч. У сённяшніх умовах такое немагчыма нават тэарэтычна. А практычна – гэта нахабная хлусня. Таму ўсе копіі падпісных лістоў павінны быць здадзеныя адмысловай міжпартыйнай камісіі для іх праверкі на сапраўднасць. Толькі так ! Хопіць махлярства і падману !
05.08.15 1:39

Павел Знавец